කුහුඹු කවක්

Paris_Eiffel_Tower_by_Faqy

අයිෆල් කුළුණ පාමුල
කුහුඹු පිළිරුව කාගෙ ද?
කාගෙවත් ඇස නො ගැසෙන
තණ පතක් මත තනි වුණ..

නිකිණි සඳවත අහසට
ඇවිත් වියපත් රෑ කල
හෙළන කඳුළක සීතල
තිබෙන තනිකම කාගෙ ද?

දුර ඈත සිට පා වෙන
ඇවිත් හිත අග යා වෙන
සුසුම් මග හැර යාවි ද
කුහුඹුවකුගේ සිහිනය…

මගේ ජන්මය

blackfathers12

නෙතින් නෙත ගැටෙන්නැතිවද
සිතින් හිස නැමෙන නිතියෙන
මැදින් සඳ මැදින් පෙනුනේ
තාත්තේ ඔබයි….
මලක සේ මෙලෙක මව් කුස
ගුලි ගැසී උන්නු එ දවස
සෙනෙහසේ සුවඳ වූයේ
ඔබේ කටහඬයි ….

හිරු මැරි වැටී අවරග
තුරු ලතා පවා මිලිනව
සරු පොලෝ තලේ ඉකිබිඳි
සැඳෑවරුවකයි……
තරු කඩා වැටුණු බිම මත
කුරුලූ දරු සිඟිත්තෙකු ලෙස
තරු දෙනෙත් ඇරී දුටුවේ
රතු ගුවන් ගැබයි…..

බිඳෙන් බිඳ සිතුම් අවදිව
පැතුම් බර මගේ දෙනයන
නැවුම් බග සඳක් වූයේ
ඔබේ දෙනයනයි……
ඒ නැවුම් සඳුන් නෙළනට
පා නගා ඇදෙන ගමනට
ආදරේ සුවඳ නොමියෙන
තාත්තේ ඔබයි……

(නිරුත්තර සමාධිය)

කනයා Kanaya

! Flower

කනේෂන් අයියාගෙ කෙටි නමයි
කනයා
ඌ අපිට පණ වුණත් දෙනවා

පත්තරකාර කනයෝ
පෑන පොඞ්ඩක් දීපං
පෑනට වයසකුත් නෑ
ජාතියකුත් නෑ බං
උඹ ලිය ලියා හිටි ලිපියේ
ඉතුරු බාගය මං ලියන්නම්

තාත්තගෙ වයසෙමයි
තාත්තා වාගෙමයි කනයා
කට ඇරපු හැටියෙම
අවවාද දෝරෙ යනවා

නවත්තහං බං ෂිකරට්
බොන්නෙපා බං අරක්කු
බොලා ඇවිත්
අපෙ ආයිෂත් ඇරගෙන
ඉන්ඩෝන මිනිස්සු

බැණ බැණ එකට බොන
සිගරට් බාගෙ දෙන
කනයාගෙ රුව ගුණ
කවකට කෙළෙස හකුළන

අරක්කු බොන කොට හවසට
කටට රහට
සරක්කු වැඩිවෙන පදමට පැමිනුණාම
මුරුක්කු මෙන් බයිට් කළත්
ඔරොප්පු නොවනා
කොලූක්කට්ටෛ වගේ
උගුරැටය සොළවා
සින්දුවක තාලෙ අල්ලයි
අපේ කනයා

ගැඹුරු හඬ මන බැන්ඳු
කියන්නෙ බෙග්ගෙම සින්දු
බුදු ගුණය ළය රැුන්දු
අපේ කනයා හින්දු

අපිටත් මචං කියනා
අපිත් මචං ම කියනා
මචංවරයෙකි කනයා
ඌ අපිට පණ වුණත් දෙනවා

බයිසිකල් කතාවක් A Story About a bicycle

cycle2

සාමිනාදන්
සයිකලයක් නොවේ ඔය
නිමලරාජන්

සිංහල අවතාර ඇවිදින
කොළොම්තොට
ගෙන්දගම් පාරක
ඉඳහිට
පාර වැරදුණු පාපැදියක්
සිහිනයෙන් මතුවෙයි.

” බොන්න යං ”
කොළොම්බු රෙස්ට් එකේ
අඩ අඳුරු මුල්ලක
මූඩියක් කැරකෙයි.

”  තල්
අවංක අරක්කු ”
මම කියමි.

නිමල්ගේ
දෑස නලියයි.
” ඒත් බං
මං ආස ගල් ”

මළකඩ කෑ
පත්තර පිටු අතර
කලබලෙන් පැද යන
මළ නො කෑ
සයිකලේ
අතරමඟ නවතියි.

”  කොහෙද යන්නෙ ”
දඩාවතේ යන බල්ලෙක්
පෝක් අත ලෙවකයි.

” කොහෙ යන්න බැරිද
මේ මගේ ගම ”
නිමල්ගේ තොල් ඇරී
උඩු ඇන්ද හිනැහෙයි

” බීලද ”
එවර බල්ලා
බර බූට් අඩි අතර.

” ඇයි
අහලද බොන්න  ඕනෙ ”

බැරියර් කඩාගෙන
පත්තරේ පිටු ඉරාගෙන
බ්රේක් නැති සයිකලේ ඉගිලෙයි.

සාමිනාදන්
ඒ තමා බං
නිමලරාජන්.

ඒ කොහොම වුණත් උඹ
පරිස්සම් වෙයන් බං
සාමි
සයිකලේ
වටේටම
ආමි.

තරාකී Tharaaki

sivaram_dharmeratnam_04

නින්ද නොඑනා අන්ධකාරය රළ   නඟයි
අන්ධකාරය බිඳී තරුවක් නුබ    නැ‍‍ඟෙයි
සිංදු කියනා මාළුවෝ නුඹෙ නම   කියයි
තරාකී නුඹෙ සරාගී කටහඬ      ඇසෙයි

මන්ද මාරුතයේ එතී එන       රුධිරයේ
සිංදු කියනා කටහඬක මතකය     තියේ
චණ්ඩ මාරුත හමා ආ රුදු       රාත‍්‍රියේ
මන්ද සකි සඳ නින්ද පතුළට   ඔබ ගියේ

කිඹුල්වත් නගරයේ නිරුවත    පෙනුනා
කිඹුල් ඇළ ඉවුරේ කිඹුල් දත්     දිළුණා
තැවුල් හදවත් දොර පියන්පත්  ඇරුණා
ඔබේ කටහඬ ඒ හදින් හද      පිරුණා

ස්ටීවන් නිත්‍යානන්දන් හෙවත් පහේ පංතියේ මතකය

Friendship

ඒ ජූලියත් ඇවිත් ගියා
ස්ටීවන්
උඹ තාම ස්වීඩන්.

පහේ පංතිය තාම ගල් වෙලා
දෙකේ පංතියේ වැඩ නිසා.

පහේදි අපට තිබුණේ
ශිෂ්‍යත්වෙ පන්නන්න විතරයි.
උඹට නම් කිරි කජු
උඹ තමයි ෆස්ට්
අන්ඩර් ඉලෙවන් හර්ඞ්ල්ස්.
ඒත් ස්ටීවන්
ඊට පස්සෙයි වැටුණේ
දිගට හරහට බැරියර්
හර්ඞ්ල්ස් වගෙ නෙමෙයි බං බැරියර්.
හොඳයි උඹ ගිය එක
චෙක් වෙවී ඉන්න එක චාටර්.

ඉඳහිට ගියත් ඉස්කෝලෙට
ගල් ගුහාවේ මරිය සුරුවම පිටුපස
අඩියක් ගහන්නට
කැන්ටිමට නම් යන්නෑ.
උඹ ආස
ටින්කිරි ටී එක බොන්න බෑ
තිත්තයි වගේ.

“පේදුරු උඹ පර්වතයකි.
ඒ පර්වතය මත
මාගේ සභාව ගොඩ නංවමි” යි කී
ජේසු ක‍්‍රිස්තුට
ඇණ ගසන්නට හොයද්දී
තුන් වතාවක්
ඔහු නාදුනන බව කී පේදුරුතුමා
තාමත් බලන් ඉන්නවා
ඉස්කෝලෙ තාප්පෙට උඩින්
බැස යන හිරු දිහා

ස්ටීවන්
මෙහෙට ඉර බැස යන කොට
ඔහෙට පායනවද?

අපේ ආගම ටීචර්
අර රතු කොට සිස්ටර්-සැමුවෙල්
දැන් කන්‍යාරාමයේ මදර් සුපීරියර්
මේ ළඟදි දවසක හමුවී
උඹව ඇහුවා
ජේසු පිහිටයි කියන්නත් කිව්වා.

ස්ටීවන්
එන දවසක වරෙන්
මහල්ලෙක් වෙලා හරි කමක් නෑ
පහේ පංතිය ගැන
කතා කර කර ඉන්නට
පුළුවන් වෙච්ච දවසක
හුස්මක් කටක් ගන්නට.

උදේ වරුවක
ටී එකක් බොමු කැන්ටිමේ
රෑ වෙලා
අඩියක් ගහමු ක්ලබ් එකේ.

සිතුවිලි

 

by Dan Quintana

සිතුවිලි අහුරකට අත තියා
වළාකුළු වෙන්නැයි පවසමි

දැන් මගේ ඒ සිතුවිලි
ආකාශයේ ඇවිද යයි

අහසේ පාවෙන
මගේම සිතුවිල්ලක් බලා මා දෙස
කියයි මේ ලෙස හිමිහිට
“උඹ තිතක්”

“කියමි මම මගේ ඒ සිතුවිල්ලට
විශ්වයේ තිතක් වන් ලෝකයක
ලෝකයේ තිතක් වන් දූපතක
තිතක්වත් නොවෙනා කොදෙව්වක
හිතක් වන්නේ කෙලෙසද?”

ඒත් සිතුවිලි මිත්‍රය!
ඔබ තිතක්
හිතක් පපුවක් තියෙන

(බත්තලංගුණ්ඩුව)