මැයි මල් සිලිටි පෙති මත

by Zdzislaw Beksinski

මැයි මල් සිලිටි පෙති මත
ඇයි මේ සිහින පිනි බිඳු?

නො සන්සුන්වද හිමිදර
ඇහැර ගන්නට බැරි
ඇසතු ගසකින් ඇසුවෙ‍ද
රෑ පුරා නිදි වැරූ
සන්සුන් ම හිත ගැන?

නේරංජනේ ඉවුරත
සිහිසන් නොවුණු සිහිනෙක
දෑසින් ගලන මඳහස
දෝතින්ම ගෙන පුදනෙමි
මෑතින් ඇහෙන කඳුළට.

හිස කෙස් සිඳින විට
සවන් පෙති දිගැරී
පුළුල් උරහිස මත
හෙමින් සැතපෙන මොහොතක
සවන් පතුළත කැළඹුන
නිවන් එළැඹුම මෙහෙම ද?

නෙළුමින් නෙළුම පියමැන
සත් වසක් පසුකළ
සත් නෙළුම් විඳි දෙපයට
බිම්බරක් දිවි හළ තැන
පස් මිටක්වද මතකය?

සමන් ගිර මුදුනත
මඟුල් සුළකුණු දියැවෙන
පතුල් පුදසුන එයම ද
වෙසක් සඳ සපැමිණ
නලල් අඩසඳ අතුරන.

මැයි මල් සිලිටි පෙති මත
ඇයි මේ සිහින පිනි බිඳු?

2017 මැයි 18

Advertisements

ම්‍යු​ගේ සැමරුම් සුවඳක

MUGUET © Manjula Wediwardena

සීත මීදුම් තිරපට
ලිහි ​ලිහී විසිරෙන
රිදී නිම්නය ඇහැරෙයි
ම්‍යුගේ* සැමරුම්​ සුවඳට…..

වසන්තය එන බව
සීනුව ගසා කීවද
නිහතමානී සුවඳින්
හිස පහත් කරගෙන….

​’​මැයි පළමු දා’​ දවසක
ඇයි ඔය දෑත් බැඳගෙන
එන්න අත් විහිදන්
ම්‍යු​ගේ මුකුටය ​තුරුළට…

සිලිටි පත් හැඳගත්
වසන්ත දසන් මැදගත්
කිනිති සුද ඉහිරන
මේ මල් කළඹ ඔබට ය

අත් හැරලන්න බැරියෙන්
​ආදරය සමරමු……………….
තෙත්බර සිලිටි මල් පෙති
නෙත් පියන් යට අහුරමු. ​

* (ඉංග්‍රීසියෙන් ​ ​’ලිලී ඔෆ් ද වැලී’ ​ලෙස මෙන්ම ‘මේ ලිලී’ සහ ​’මේ බෙල්ස්’ ලෙසින්ද හැදින්වෙන ​’ම්‍යුගේ’ මල,​ ෆ්‍රන්සයේ​ ​මැයි පළමුදා ​සැමරුම් මල ලෙස යොදා ගැනේ.)