වසන්ත අයියා ගිහින්ද…..?

the-shapes-of-emptiness-patricia-velasquez-de-mera
පැට්‍රීෂියා වෙලාස්කස් දු මේරාගේ සිත්තමක්

වසන්තයට මඟ කිය කිය
පැරිස් මිමෝසා හිනැහුණ
වසන්ත සුළඟෙහි පාවී
වසන්ත අයියා ගිහින්ද…..?

පැරිස් අහස ළං වෙනකොට
විසල් කුලුණ සසැලෙන හැටි
සැහැල්ලුවෙන් කියාදුන්න
වසන්ත අයියා ගිහින්ද…..?

අනන්තය ළඟට කැඳවා
සුසුම් කපොල්ලක රඳවන
ඉන්ද්‍රජාල කතා කිව්ව
වසන්ත අයියා ගිහින්ද….?

වයින් බිඳු පිරී ඉතිරෙන
වසන්තමය සිහින බඳුන
බිඳෙන්නට නොදී රැකගත්
වසන්ත අයියා ගිහින්ද…?

ඇසින් උසුලගන්නට බැරි
වසන්තය ඉතින් මෙහෙමැයි
හිමින් කියා දී – නොකියම
වසන්ත අයියා ගිහින්ද….?

2016 මැයි 06

Advertisements