මුල් උදුරා වහල්ලු කොට වැඩ ගැනීමේ පෙර නිමිති

soldier_&_refugees

(මෙම සංවාදමය සටහන 2007, ජූලිමස රාවය පුවත්පතේ පළවූවකි. එහි අවසානය විසින් මතුකරන අර්ථය නැවත කියවා බැලිය යුතුය.)

“උතුර නැගෙනහිර දකුණ ද බටහිර එක කොඩියේ සෙවනේ “යැයි සුනිල් ශාන්තයෝ ගැයූහ.ගීතයක් තුළ පවා උතුර සහ නැගෙනහිර එක්ව සිටීම නොරිස්සුවෝ එය “දකුණ නැගෙනහිර උතුර ද බටහිර ” සේ ඈත්ව තැබීමට උත්සුක වූහ.

මාවිල්ආරු ක‍්‍රියාන්විතය තුළ දකුණට සන්නිවෙදනය කළ ප‍්‍රතිප‍්‍රහාර දැක්වීමේ ක‍්‍රම වේදය පසෙකින් තබා ඍජුව ම නැගෙනහිර මුදවා ගැනීම අභිප‍්‍රාය කොට ගත් යුද මෙහෙයුම් ක‍්‍රියාත්මක කිරීමට ත‍්‍රිවිධ හමුදාවෝ මේ මොහොතේ දී ත් පේ වී සිටිති.එය ආණ්ඩුවේ මිලිටරිමය ප‍්‍රකාශනය මිස අනෙකක් විය නොහැකිය.”අපි වෙනුවෙන් අපි”ප්‍රොපගැන්ඩා යාන්ත‍්‍රනය හරහා දකුණේ උත්කර්ෂයට නැංවූ ත‍්‍රිවිධ හමුදාවන්ගේ පරෝපකාරී ජාති හිතෛෂීභාවය මෙම යුද මෙහෙයුම් තුළ යතාර්ථයක් ද යන්න විමසා බැලිය යුතු අතිශයින් සංකීර්ණ ගැටළු සමුදායයකි.

නැගෙනහිර වත්මන් යුද මෙහෙයුම් පිළිබඳ දකුණේ මතවාදී අවකාශයක සැරිසරමින් සිටිනා අතරතුර ද නේෂන් පුවත්පතේ නියෝජ්‍ය කතුවර මාලින්ද සෙනෙවිරත්න හමුවිය.

“යුද්ධයක් නැති තත්වයක් තියෙනවා නම් හොඳයි.ඒත් අපි ආස කරන යුතෝපියාවන්ට යන්න අමාරුයි.ඒවා යතාර්ථවාදී නෑ” ඔහුගේ පිවිසුම එබඳුය.ඔහුට අනුව මේ රටේ පවතින්නේ ත‍්‍රස්තවාදයකි.එය ජාතික ආරක්ෂාවට තර්ජනයකි එබැවින් රජයක් ලෙස ඊට එරෙහිව ගත යුතු පියවර රාශියක් තිබේ.

“යුද්ධය හරියට කරනවද නැද්ද කියන එක වෙනම කතාවක්. ඒත් යුද්ධයක් කරන්න සිද්ධ වෙලා තියෙනවා. ltte එක 2002 ට වඩා ජාත්‍යන්තරවල මිලිටරිමයවල මතවාදීමය ලෙස හැම අතින්ම දුර්වලයි.පිරිසක් හැටියටත් බෙදිලා.මේක රජයට වාසිදායක තත්වයක්.ඒ තුළ නැගෙනහිර මුදා ගන්න එක ඉතා වැදගත්. මතවාදීමය වශයෙන් තියෙන මේවා අපෙ නිජබිම් කියන සංකල්ප එතනින්ම හමාර වෙනවා.අධිකරණ තීන්දු මගින් හෝ යුදමය ක‍්‍රියාමාර් මගින් ලබන ජයග‍්‍රහණ පමණක් මේකට ප‍්‍රමාණවත් වෙන්නේ නෑ. ltte ග‍්‍රහණයෙන් මුදාගන්න දෙමළ මුස්ලිම් ප‍්‍රජාව අපේ පුරවැසියො කියන එක අපේ ඔළුවෙ නැත්නම්.නැගෙනහිර මුදා ගැනීමට සමාන්තරව එහි ප‍්‍රජාවගේ ජීවන රටාවලට ලොකු ධනාත්මක වෙනසක් ඇති වෙන විදියේ සැළසුමක් ක‍්‍රියාත්මක කෙරෙන්න ඔනා”

ඒත් වත්මන් ආණ්ඩුව තුළ එවැනි සැළසුමක් නැති බව මාලින්දගේ විශ්වාසයයි.එසේම දේශපාලන උවමනාවන්ට අනුව යුද සැළසුම් නිර්මාණය වනවා නම් හෝ පැනඩෝල් පෙත්තේ සිට මෝටාරය දක්වා කොමිස් ගිලීමේ උවමනාව යුද්ධය තුළ පවතිනවා නම් එය තේරුමක් නැති යුද්ධයක් බව මාලින්ද පවසයි.මෙම යුද මෙහෙයුම් හරහා සිවිල් වැසියන් ඝාතනය වීම ඔහු දකින්නේ මෙලෙසිනි.

“මිනිස්සු මැරෙනවා තමයි.ඒවා හිත හිත යුද්ධ කරන්න බැ.රට දීලා දාන්න ද කියන්නේ.ඒවා බේදවාඡකයන්.ඒවා අවම වෙන එකයි කෙරෙන්න ඔන.යුද්ධ කරන්න පුළුවන් පූජනීය විදියක් සුජාත ආකාරයක් නැහැනේ ”

“මේක සාකචිඡ මේසයට කැඳවීමට කෙරෙන බලපෑමක් ”

සාම සාකචිඡ මග හැරීමට උත්සාහ ගත්ල එජාප පාලන සමයේ සටන් විරාමය තුළත් හමුදාවන්ට පහර දුන්ල එජාපය බලන් සිටිය දී මිනිස් ඝාතන සිදුකළ ltte ත‍්‍රස්තවාදීන්ගේ මිලිටරි බලය අඩපණ කොට ඔවුන් සාකචිඡ මේසයට කැඳවීමට මහින්ද රාජපක්ෂ රජය විසින් ගනු ලබන්නා වූ උත්සාහයක් ලෙස නැගෙනහිර මුදා ගැනීමේ යුද මෙහෙයුම් අර්ථකථනය කරන මහාචාර්ය බෙල්ලන්විල විමලරතන හිමියෝ අවසාන විග‍්‍රහයේ දී සාකචිඡව වැදගත්ම ක‍්‍රියාමාර්ගය ලෙස ද දකිති.

“නිල හමුදාවක් විදියටල තමන්ගෙ කඳවුරු විනාශවෙනවා නම් තමන්ගේ සෙබල මුළු විනාශවෙනවා නම් බලාගෙන ඉන්න පුළුවන් කමක් නෑ.මේවට උත්තර දෙන්න ඔන ඒ විදියටම තමයි. ජාත්‍යන්තර ආධාර ලබන රාජ්‍ය නොවන සංවිධානවල අය කෑගහන්න පුළුවන් මේවා වැරදියි කියලා.ඒ අයට ආධාර ලැබෙන්නේ ඒවට තමයි.නමුත් රජයකට එහෙම බෑ.ත‍්‍රස්තවාදයට උත්තර සොයන්න රජයට සිද්ධවෙනවා.නමුත් සිවිල් වැසියන්ට වෙන පීඩාව අවම වෙන විදිහටයි ප‍්‍රහාර දියත් කළ යුත්තේ ”

“මෙය ප‍්‍රශ්නය තව තවත් අවුළුවාලීමක් ”

මහාචාර්ය ජයන්ත සෙනෙවිරත්න යුද්ධයට එරෙහි මතවාදයක පිහිටා ක‍්‍රියාකරන විද්වත් සමාජ කි‍්‍රයාකරිකයෙකි.ආණ්ඩුව මෙම යුද මෙහෙයුම හරහා අන්තවාදීන්ගේ අතකොළුවක් ලෙස කි‍්‍රයාත්මක වෙමින් සිටින බව ඔහු පවසයි.වත්මන් දේශපාලන සැළසුම් මෙන්ම යුද සැළසුම් ද මෙම අන්තවාදීන්ගේ වීම හරහා රට තුළ ඉතා භයානක තත්වයක් නිර්මාණය වෙමින් පවතින බව ද ඔහු පවසයි.

“මේ මෙහෙයුම් එල්ල වෙලා තියෙන්නේ ඉලක්ක කණ්ඩායම්වලට නෙවෙයි.සාමාන්‍ය ජනතාවගේ ඔළු ගෙඩිවලට.මේක විශාල මානූෂීය ප‍්‍රශ්නයක්.දැන් මේක ජාත්‍යන්තර තලයේ මාතෘකාවක් බවට පත්වෙලා ඉවරයි.මේක ආණ්ඩුවට විශාල කැළලක්.ආණ්ඩුව දැන් හිතන්නේ යුද මෙහෙයුම් විතරයි,ජාතික ප‍්‍රශ්නය විසඳන්න තියෙන එකම උපායමාර්ගය කියලා.අනිත් පැත්තෙන් ltte ය තමන්ගේ ජනතාව පීඩාවට පත්වෙන්න ඉඩ දීලා ඒ හරහා ජාත්‍යන්තර අවධානය යොමුකර ගැනීමට උත්සාහ කරනවා.එකෙන් ජාත්‍යන්තර ප‍්‍රජ‍්‍රාව හා රජය අතර විශාල මතවාදී ගැටුමක් ඇතිවෙලා. ආණ්ඩුව සිදුකරන ජාත්‍යන්තර මානවවාදී නීතිය උල්ලංඝනය කිරීම හරහා විශාල අනුකම්පාවක් දිනා ගැනීමයි ltte අභිලාශය”

යුරෝපා සංගමයේ ඊලඟ සභාපතීත්වය හිමිවන්නේ ජර්මනියට බවත් ජර්මනිය ltte විරෝධී දැඩි මතවාදයක පිහිටා නැති බැවින් වර්තමානයේ යුරෝපා සංගමයේ පවතින ltte තහනම ඉවත් කිරිමට පවා ඉඩ ඇති බවත් මහාචාර්ය ජයන්ත පවසයි.

“යුද්ධය වළක්වන්න බැරි තර්කයක් ”

විකල්ප මතධාරියෙකු වන කොළඹ විශ්වවිද්‍යාලයේ දේශපාලන අංශයේ ජ්‍යෙෂ්ට කිථිකාචාර්ය ධම්ම දිසානායක පවතින යුද්ධයට පක්ෂ හා විරුද්ධ දෙවර්ගයේම ගුරුකුල සිදුකරමින් සිටින්නේ යුද්ධයට උදව්කිරීම බවත් එබැවින් මේ දෙකම ප‍්‍රතික්ෂේප කරන මානූෂිය ව්‍යාපාරයක් ගොඩනැගිය යුතු බවත් පවසයි.ඒ හරහා යුදවදින දෙපාර්ශවයට ම යුද මෙහෙයුම් නවතා සාකචිඡ මේසයට එමට බලපෑම් කළ යුතු බවත් ඔහුගේ උපකල්පනයයි.ඔහු එම උපකල්පනය ගොඩනගන්නේ මෙබඳු විග‍්‍රහයක් මත පදනම් වෙමිනි.

“ජනවාර්ගික ගැටුම තීරණාත්මක හා සන්නද්ධ ගැටුමක් ලෙස 1983 න් පස්සේ ඉස්සරහට එන්න පටන් ගන්න කොට ඒ ආපු වේගෙට සමගාමීව අපේ ඊට අදාලව දේශපාලන සංස්කෘතියක් වර්ධනය වුනේ නෑ.83න් පස්සේ සන්නද්ධ දේශපාලනය ධ‍්‍රැවීකරණය වුණා. උතුරු නැගෙනහිර සන්නද්ධ දේශපාලන කි‍්‍රයාමාර්ග එක පසෙකට ධ‍්‍රැවීකරණය වෙද්දී රාජ්‍ය හමුදාවල යුදමය ආමන්ත‍්‍රණය අනෙක් පසට ධ‍්‍රැවීකරණය වුණා.සමාජයක වෙන්න ඔනෙ මේ ධ‍්‍රැවීකරණ දෙකම වටහා ගෙන ඊට ඉහළින් හෝ මැදින් මතුවන එක්තරා විදිහක පුළුල් දේශපාලන සංස්කෘතියක් මේ දෙක අතර ඇතිවන ගැටුම විසඳනු ලබන දේශපාලන ප‍්‍රවාහයක් ඉදිරියට එමට නියමිතව තිබුණා.නමුත් එහෙම දෙයක් වුණේ නෑ. එයට හේතුව යුදමය ක‍්‍රියාමාර්ග දේශපාලනයට වඩා අධිනිශ්චය වෙනකොට ඒකට ලංකාවේ සිවිල් සමාජය හා අනෙකුත් සියලූ සමාජ ස්ථර දැක්වූයේ ප‍්‍රතිචාරාත්මක භාවයක් නිර්මාණාත්මක භාවයක් නෙවෙයි.

“දැන් වෙනකොට වෙලා තියෙන දේ තමයි මේ ධ‍්‍රැවීකරණයන් කිසිවෙකුටත් ලංකරන්න බැරි ආකාරයට උග‍්‍ර වෙලා ඉවරයි.මේ තුළ යුද්ධය වළක්වන්න බැරි තර්කයක් බවට පත්වෙලා.ඒ බැරිකම ඇතුළේ දෙපැත්තෙන්ම කරන යුද මෙහෙයුම් අපි කැමති උනත් අකමැති උනත් ප‍්‍රශ්නයට අවශ්‍ය උත්තරයි හොයන්නේ ඒක හරි භයානක එකක් වෙන්න පුළුවන්.

“විසඳුම සාකචිඡව හා සම්මුතියයි”

යුද්ධය ඉතිහාසය මත පදනම් වුණු තාර්කික යතාර්ථයක් වුණත් ප‍්‍රශ්නයට උත්තරයක් නොවණ බව යුද්ධයේ සක‍්‍රිය අත්දැකීම් බහුල හිටපු ගුවන් හමුදාපතිවරයෙකු වන එයාර් වයිස් මාර්ෂල් හැරී ගුණතිලකගේ අදහසයි.මාධ්‍ය හරහා දස වසරක පමණ ඉහත සිට ඔහු දැරූ ස්ථාවරය අදද කිසිදු වෙනසක් නැත.යුද්ධයට එකම විසඳුම සාකචිඡව හා ඒ මගින් එළැඹෙන සම්මුතිය හා පමණක් බවයි ඔහු පවසන්නේග ඔහුට අනුව ltte යට හෝ ත‍්‍රිවිධ හමුදාවට කිසිවිටෙකවත් උනුන් පරාජය කළ නොහැකිය.

ltte ය පූර්ණ වශයෙන් මර්දනය කරන්න පුළුවන් කියලා ආණ්ඩුව උපකල්පනය කළත් මේ ප‍්‍රශ්නය වෙනත් තැනකින් වෙනත් ප‍්‍රවේශයකින් මතුවන එක කාටවත් වලක්වන්න බෑ.ඒ විදියටයි අවුරුදු 23ක් තිස්සේ මේ යුද්ධය දිග්ගැස්සිලා තියෙන්නේ.වත්මන් යුද මෙහෙයුමේ එක් පදනමක් තමයි උතුරින් නැගෙනහිර වෙන් කිරීම. ඒකම තමයි ලොකුම ප‍්‍රශ්නය.කොහොමද එහෙම වෙන් කරන්නේ. ඉන්දියාවෙ ස්ථාවරය මන්මෝහන් සිං හරහා ප‍්‍රකාශවෙලා තියෙනවා එහෙම කරන්න එපා කියලා.ඉන්දියාව මේකට විරුද්ධ වුණොත් අපට පුළුවන්ද ඒගොල්ලොත් එක්ක ගහගන්න”

“මේක තුට්ටු දෙකේ ශ‍්‍රමිකයන් බිහිකරලීමේ මෙහෙයුමක් ”

යුද හමුදාපති සරත් ෆොන්සේකා ගේ අලූත් අවුරුදු පණිවිඩය තුළ බෙදුම් සතුරන් අතුගා දමා තම මාතෘ භුමිය නිදහස් කර ගැනීම 2007 වසර තුළ සිදු කරන බව සඳහන් විම ඉතාම බරපතල යුද නිමිත්තක් බව නව වාමාංශික පෙරමුණේ අධ්‍යාපන ලේකම් රනත් කුමාරසිංහගේ මතයයි.ජනාධිපතිවරයා හා විපක්ෂ නායකවරයා ද සිය අලූත් අවුරුදු පණිවිඩවලින් පවසා තිබුණේ සාමය ගෙන ඒම වුවත් අවුරුද්ද එළැඹීමත් සමග ම ගුවනින් බොම්බ දමා සිවිල් වැසියන් හා ළමුන් රැසක් ඝාතනය කිරීම ඔවුන්ට ලබා දුන් අවුරුදු තෑග්ග දැයි රනත් ප‍්‍රශ්න කරයි.

“ltte ය සැළකිය යුතු පරාජයකට ගෙන යාම පිළිබව ආණ්ඩුව හා විපක්ෂය අතර පැහැදිලි එකඟතාවක් තියෙනවා. ඒත් ltte ය කියලා අඟහරු ලෝකෙන් කඩා වැටිචිච සංවිධානයක් නෑ . දෙමළ විමුක්ති අරගලේ ප‍්‍රධාන ප‍්‍රකාශකයා ලෙස ඉන්නේ කොටි සංවිධානය.ඒක පරාජයකට ගෙන යනවා කියන්නේ දෙමළ ජනතාවගේ පිටකොන්ද කැඩිම.පිටකොන්ද කඩලා මේගොල්ලො කැමති සොචිචම් විසඳුමක් ඒ අයගෙ කරේ පැටවීම තමයි ඒ අයගේ බලාපොරොත්තුව.ප‍්‍රදේශිය බල බෙදීමකට කවදාවත් දෙමළ ජනතාව එකඟ වෙන්නෙ නෑ.එකඟ වෙන්න පුළුවන් කමක් නෑ.උතුරු නැගෙනහිර ඒකාබද්ධතාව පිළිගත් යෝජනා තමයි ඉදිරිපත් වෙන්න ඔන”

නැගෙනහිර යුද මෙහෙයුම් පිළිබඳ රනත්ගේ විග‍්‍රහයට අනුව යුද්ධයෙන් එළියට වැටෙන මින්සුන්ගේ භුමිය අත්පත් කරගෙන එහි ආර්ථික ව්‍යාපෘති නිර්මාණය කිරීමේ සැළසුම් කෙරේ. හිමිකරුවන්ගෙන් තොර භුමිය ආණ්ඩුවට අවශ්‍ය ලෙස පරිහරණය කළ හැකිය.ජනතාව තමන්ගේ සාම්ප‍්‍රදායික වෘත්තීන්ගෙන් ඉවත් කොට කර්මාන්තල සංචාරක ව්‍යාපාරල ඛනිජ සම්පත් විකිණීම වැනි ව්‍යාපෘති ස්ථාපිත කිරීම මෙම යුද මෙහෙයුම්වල අභ්‍යන්තරික වුවමනාව බව ඔහු පවසයි. සාම්පූර්වල ගොඩනැගීමට නියමිත බලාගාරය ද එබන්දකි.දැනටමත් ධීවරයින් විකල්ප වෘත්තින් සඳහා යොමුකිරිමේ ව්‍යාපෘති එහි තවත් ප‍්‍රකාශනයත් බව ද ඔහු පවසයි.

“ltte ය පරාජය කිරීම කියන්නේ මේ විදිහට මුළු ජන ජීවිතය ම කඩාකප්පල් කරලා ඒ අයගෙ මුල් උදුරලා අන්තිමට නිදහස් ශ‍්‍රමිකයන් බවට පත් කිරීම.ලාබ ශ‍්‍රමය බවට පත් කරලා ඒ අය අසරණ කරලා වහල්ලු කරලා වැඩ ගන්න. ඒ අයගෙ ජාතිකත්වය හින්දලා දාලා ජාතික අභිමානය දියකරලා දාලා තුට්ටු දෙකේ ශ‍්‍රමිකයන් බවට පත් කිරීම.මේක ඉතා බරපතල ලෙස සැළකිය යුතු කාරණයයි”

Advertisements