බයිසිකල් කතාවක් A Story About a bicycle

cycle2

සාමිනාදන්
සයිකලයක් නොවේ ඔය
නිමලරාජන්

සිංහල අවතාර ඇවිදින
කොළොම්තොට
ගෙන්දගම් පාරක
ඉඳහිට
පාර වැරදුණු පාපැදියක්
සිහිනයෙන් මතුවෙයි.

” බොන්න යං ”
කොළොම්බු රෙස්ට් එකේ
අඩ අඳුරු මුල්ලක
මූඩියක් කැරකෙයි.

”  තල්
අවංක අරක්කු ”
මම කියමි.

නිමල්ගේ
දෑස නලියයි.
” ඒත් බං
මං ආස ගල් ”

මළකඩ කෑ
පත්තර පිටු අතර
කලබලෙන් පැද යන
මළ නො කෑ
සයිකලේ
අතරමඟ නවතියි.

”  කොහෙද යන්නෙ ”
දඩාවතේ යන බල්ලෙක්
පෝක් අත ලෙවකයි.

” කොහෙ යන්න බැරිද
මේ මගේ ගම ”
නිමල්ගේ තොල් ඇරී
උඩු ඇන්ද හිනැහෙයි

” බීලද ”
එවර බල්ලා
බර බූට් අඩි අතර.

” ඇයි
අහලද බොන්න  ඕනෙ ”

බැරියර් කඩාගෙන
පත්තරේ පිටු ඉරාගෙන
බ්රේක් නැති සයිකලේ ඉගිලෙයි.

සාමිනාදන්
ඒ තමා බං
නිමලරාජන්.

ඒ කොහොම වුණත් උඹ
පරිස්සම් වෙයන් බං
සාමි
සයිකලේ
වටේටම
ආමි.

Advertisements